هل الإسلام واقعيّ لمّا يقول لك سلّف واحد ألف جنيه
وخدهم منّه بعد سنة ألف جنيه بردو ؟! .. 🤔
ويروح فين التضخّم ؟!
يعني الألف جنيه اللي هيرجّعهم لي بعد سنة دول هتكون قيمتهم 900 جنيه
فأنا كده كمقرض اتظلمت .. 🥹
شوف حضرتك
📌 أوّلا :
اللي خزوقك في حوار التضخّم دا هو الدولة الحديثة - مش الإسلام
الإسلام قال لك العملة هي الذهب والفضّة
ودول قيمتهم ثابتة
إنت ودولتك الحديثة ما عجبكمش الكلام ده
وطبعتم ورق كوتشينة بدون غطاء نقديّ من الذهب
فلبستم خازوق التضخّم
فروح حلّ مشكلتك مع الدولة - مش مع الإسلام
ولمّا الاختراع بتاع ورق الكوتشينة دا يلبّسك في التضخّم - يبقى الغي اختراع ورق الكوتشينة - وارجع للأصل - الذهب والفضّة
مش تلغي أحكام الإسلام وعاوز تحلّل الربا
📌ثانيا :
لو حاليا عاوز تتجنّب مخاطر التضخّم - سلّف ذهب - واستردّ ذهب
📌ثالثا :
خلّلي التسليف على مدى زمنيّ محدّد
يعني ما ينفعش تسلّف حدّ فلوس وتيجي تستردّها منّه بعد 20 سنة
هتقعوا في مشكلة إنّه قيمة الفلوس دي كانت كذا وقتها
ودلوقتي لا قيمة لها
أنا بعد وفاة والدي الله يرحمه
كان والدي الله يرحمه عنده حقوق لأخته - ولزوجته
رجّعت لعمّتي أرضها بقيمة الأرض
ولزوجة أبي ذهبها بقيمة الذهب
مع إنّ العرف ( الفاسد ) بيقول اللي استلف جنيه يرجّعه جنيه
لكن أنا حسبتها بقيمة الأرض والذهب - مش بقيمة الورق
وكان سعر أرض عمّتي تضاعف 20 مرة تقريبا !!!
وسعر ذهب زوجة أبي تضاعف 5 مرّات تقريبا !!!
وبعد زواجي بفترة وأنا باشتري السيّارة - زوجتي باعت ذهبها للمشاركة في شراء السيّارة
وأنا برجّعه ليها رجّعته بقيمة الجرامات - مش بقيمة الفلوس
كان سعره تضاعف ثلاث مرّات تقريبا
وحاليا لو حدّ طلب منّي سلف باعطيه ليه بقيمة الذهب بردو
📌رابعا :
ودا الأهمّ - عشان كده سايبه للآخر
مفهوم الإقراض في الإسلام مختلف
الإقراض في الإسلام هو ( نصف الصدقة )
قال رسول الله صلّى الله عليه وسلّم ( إنّ السلف يجري مجرى شطر الصدقة )
يعني لو أقرضت شخصا ما ألف جنيه - ثمّ ردّ لك هذا الإنسان نفس الألف جنيه - فكأنّك تصدّقت ب 500 جنيه
طب وأنا كسبت إيه ؟!
كسبت صدقة ال 500 جنيه
هوّا إنت لمّا بتتصدّق ب 500 جنيه أصلا بتكسب إيه ؟!!!
بتكسب ثواب الصدقة
هذا عمليّا القرض يبقى أنفع ليك من الصدقة .. 😳
لإنّك لمّا تصدّقت ب 500 جنيه طلعوا من جيبك للأبد وخدت ثوابهم
لكن لمّا أقرضت 1000 جنيه خدت نفس الثواب - ورجعت لك فلوسك.☺️
اذن تجارة التسليف هي تجارة أكثر ربحا من تجارة الصدقة
تجارتان مع الله سبحانه وتعالى
وبعدين ييجي الإسلام يقول لك سلّفت واحد 1000 جنيه - وجاء موعد السداد - والمقترض معسر ومش معاه يسدّ .. 🤔
قال رسول الله صلّى الله عليه وسلّم ( من أنظر معسرا - كان له كلّ يوم صدقة - ومن أنظره بعد حلّه - كان له في كلّ يوم مثله صدقة )
يعني مسلّف واحد ألف جنيه ليوم كذا - جاء يوم كذا وفلان دا معسر - فقلت له براحتك سدّد وقت ما يكون معاك فلوس - فدي صدقات بتتراكم ليك
الموضوع مش بيزنس محض زيّ ما إنت متخيّل
الخيال ده صنعته بردو الدولة الحديثة في عقول وقلوب الناس
فبقينا زيّ الحيوانات كلّ واحد عاوز يشوف هينهش من التاني إيه !!!
لكن الإسلام ما قالش كده
الإسلام قال إنّك بتقرض فلان مش عشان تكسب من وراه - ولكن عشان تفكّ كربه .. 😥
دا اختراع اسمه التكافل بين الناس والتراحم بين الناس .. ☺️
الدولة الحديث عمرها ما هتكلّمك عنّه 🥹
( منقوووووووول )
ليست هناك تعليقات:
إرسال تعليق