جميع وظائف السياحة والفنادق ( متجدد )

EGYPT 

EGYPT  مصر

**( السلام عليكم ورحمة الله وبركاته )**

سوف اشرح فى هذا الموضوع المتجدد ان شاء الله تفاصيل عن جميع وظائف السياحة والفنادق بالتفصيل من حيث شروط كل وظيفة و المميزات و العيوب و طبيعة العمل ومتوسط المرتب

نبدأ بسم الله ,,,

( وظيفة المرشد السياحى )

- شروط الوظيفة : يجب ان يكون خريج قسم الارشاد السياحى من كلية سياحة او معهد سياحة وفنادق معترف بيه او يكون حاصل على دبلومة الارشاد السياحى , المهم لازم يكون معاه رخصة الارشاد السياحى وخلاص .

وطبعا لازم اللغة شرط اجبارى للوظيفة دى وعلى الاقل يكون معاك لغتين 100% من بينهم الانجليزى و لازم كمان يكون بيفهم فى فن التعامل مع الاخرين وخصوصا لو كان من خارج مصر ويكون اجتماعى وخلوق ومثقف .

- المميزات : المكانة الاجتماعية - المرتب الكبير - فرصة الترويح او التنزه بسهولة - له نقابة ( المرشدين السياحيين )

- العيوب : وظيفة مرهقة فى اغلب الاحيان لان الاثار السياحية معظمها موجودة فى مناطق حارة وجافة زى الاقصر واسوان واهرامات الجيزة - التعرض للفتنة قصدى البنات الاجانب يعنى  - الاغتراب فى ايام العمل المستمرة - التعرض للاسئلة والمعلومات الكتير من الاجانب ويا حبذا لو انت مش عارف امام الفوج السياحى الصراحة بيبقى منظرها مش تمام عشان كده لازم الثقافة السياحية الكبيرة .

- طبيعة العمل : اظن الناس كلها عارفينها وهى ان المرشد السياحى بيرافق الفوج السياحى اللى معاه وبيروحوا للمكان السياحى وهنا تاتى وظيفة المرشد الاساسية فى امدادهم بالمعلومات عن ذلك المكان وتوجيهم ويعرف السياح تاريخ هذا المكان قديما ونبذة عنه وبعدين بيكمل المرشد الرحلة او البرنامج السياحى مع السياح عادى .

- متوسط المرتب : يتراوج ما بين 100 الى 200 فى اليوم 

اما لو شهريا فالمرتب ما بين 3000 الى 6000 جنية شهريا وممكن اكتر من كده كمان على حسب اللغة اللى معاك والمكان السياحى اللى انت بترشد فيه .

( وظيفة موظف الاستقبال )

Receptionist

- شروط الوظيفة : يجب ان يجيد فن التعامل مع العملاء وذو مظهر حسن ويعمل بهذة الوظيفة خريجى الجامعات او المعاهد ولكن يفضل غالبا خريجى السياحة والفنادق من الثلاثة اقسـام , وطبعا لازم يكون موظف الاستقبال يجيد اللغة الانجليزية وياريت لغة كمان , و معظم الفنادق الكبيرة مبياخدوش الا اللى معاه لغتين 

- المميزات : وظيفة مريحة الى حد ما - المرتب معقول - التعامل مع عملاء معظمهم ناس محترمين وخصوصا فى الفنادق الكبيرة .

- العيوب : المرتب قليل عند التوظيف فى البداية وبعد كده بيزيد بعد فترة - التعامل الخطأ مع عميل واحد ممكن يسببلك مشكلة .

- طبيعة العمل : يقوم موظف الاستقبال بدور مهم واساسى فى الفندق او المؤسسة لانه واجهة العميل الاولى عند دخوله الفندق .

ويقوم موظف الاستقبال بالتعامل مع العملاء واستقبالهم وتحيتهم وتلقى الشكاوى وتوزيع الغرف على العملاء والاحتفاظ بمفاتيح غرف العملاء والاحتفاظ بالسجلات التى تحتوى على حالة كل غرفة سواء مشغولة او لا او بها عيب او غير صالحة

- متوسط المرتب : يختلف من فندق لاخر ومن مؤسسة لاخرى , يعنى مثلا موظف استقبال لسه متعين جديد فى فندق بيكون مرتبه تقريبا 450 جنية او اكتر ولكن بيزيد بعد عدة اشهر وممكن يعدى الـ1000 جنية وطبعا فى الفنادق الكبيرة المرتبات بتبقى كبيرة و كويسة , يعنى من الاخر المرتب بيبقى نسبى و متغير

( موظف حجز تذاكر الطيران )

Ticketing Clerk

- شروط الوظيفة : يجب ان يجيد فن التعامل مع العملاء وذو مظهر حسن وصبور لانه يتعامل مع ناس جميع فئات المجتمع .

ويعمل بهذة الوظيفة خريجى الجامعات او المعاهد والاولوية تكون لخريجى السياحة والفنادق وخصوصا قسم الدراسات السياحية , ولازم يكون موظف حجز الطيران مجيد للغة الانجليزية كويس وفاهم فى الكمبيوتر ( ICDL ) ويكون معاه شهادة اماديوس او جاليليو فى حجز تذاكر الطيران الكترونيا وهو النظام السائد الان .

- المميزات : وظيفة متوفرة بمصر والدول العربية فى مختلف شركات السياحة والطيران - المرتب كويس .

- العيوب : التعامل مع عملاء من كافة فئات المجتمع يعنى الوحش والكويس ولازم طبعا الصبر فى الوظيفة دى - مدة ساعات العمل طويلة فى معظم الشركات .

- طبيعة العمل : يقوم موظف حجز تذاكر الطيران بأخذ بعض المعلومات من العميل التى تساعده فى حجز تذكرة الطيران مثل الاسم ورقم التليفون واسم شركة السياحة ( ان وجد ) ومكان المغادرة والوصول والدرجة ورقم الصف وغيرها ويدخل موظف الحجز هذة المعلومات على نظام اماديوس الخاص بالشـركة ثم ينهى الحجز .

- متوسط المرتب : المرتب كويس , يعنى فى مصر فى شركة سياحة من 500 الى 900 جنية وبيبقى فى عمولة على بيع التذاكر , اما فى الخليج والدول العربية لا يقل المرتب عن 2000 ريال لو فى السعودية + العمولة والبدلات وبرضو فى الامارات المرتبات عالية وكويسة .

( المضيف الجوى )

Air Host / Hostess

- شروط الوظيفة : يجب ان يجيد فن التعامل مع العملاء ومساعدة الاخرين وذو مظهر حسن وايضا هدوء الاعصاب

بالاضــافة الى بعض الشروط الاخرى التى تضعها شركات وخطوط الطيران من حيث الطول والوزن وسمـات شخصية تانية ويشترط فى معظم الشـركات عمل المقابلة الشخصية قبل التوظيف والاغلبية فى هذة الوظيفة بيكونوا بنات

ويعمل بهذة الوظيفة خريجى الجامعات او المعاهد و يفضل خريجى السياحة ولكن مش بدرجة كبيرة غالبا , ولازم طبعا اجادة لغة او لغتين والتعامل الكويس وبحكمة .

- المميزات : وظيفة متوفرة الى حد ما - المرتب عالى جدا - متعة السفر الدائم لبلاد العالم لمحبى السفـر 

- العيوب : تكاد تكون خالية من العيوب , لكن فى عيب وحيد بالنسبة للبنات المضيفات ان بعض الشركات (مش كلها) بتشترط خلع الحجاب للاسف وايضا هناك عيب اخر وهو ملل السفر والتعب عند بعض الموظفين

- طبيعة العمل : يقوم المضيف الجوى باعمال مختلفة على متن الطائرة مثل : خدمة المسافرين وتقديم الاغذية والمشروبات المختلفة والتعامل مع الحالات الخاصة والطارئة مثل المعاقين او المكفوفين وايضا التأكد من سلامة المسـافرين ومعدات السلامة والاسعافات الاولية 

- متوسط المرتب : المرتب عالى جدا وفى مميزات اخرى كتير - ما شاء الله - فالراتب فى طيران الامارات مثلا لا يقل عن 3500 درهم بالاضافة الى السكن والتأمين والترقيات ( بعد 3 سنوات تقريبا ) وغيرها .

اما فى طيران سما مرتب المضيف الجديد لا يقل عن 2500 ريال سعودى + بدل سكن ومواصلات 

اما مصر للطيران فالرواتب حلوة الى حد ما بس للاسف مبتوظفش الا ابناء القاهرة الكبرى فقط عشان كده قولتها فى الاخر

( الشيــف او الطبـــاخ )

Chef

- شروط الوظيفة : يجب ان يكون خريج سياحة وفنادق قسم الدراسات الفندقية وذو مهارة عالية فى فن الطهو الفندقى واعداد وانتاج الاغذية والمشروبات المختلفة وتخزينها ويشترط دائما الخبرة سابقة .

- المميزات : مرتب كويس - الاقامة والوجبات على حساب الفندق .

- العيوب : ساعات العمل طويلة فى معظم الفنادق والمطاعم - الغربة علطول لان العمل غالبا بيبقى فى مناطق سياحية الا لو كان العمل فى محل الاقامة او بالقرب منه . 

- طبيعة العمل : يقوم الشيــف باعداد الاغذية والاطباق والمشروبات المختلفة للعملاء او المقيمين وتكون غالبا ساعات العمل طويلة فى هذة الوظيفة .

- متوسط المرتب : المرتب كويس , لا يقل عن 1000 جنية فى فنادق مصـر , اما الخليج فالمرتبات كبيرة لا تقل 1500 درهم فى الامارات , و لا تقل عن 2000 ريال لو فى السعودية والمرتبات معظمها بتبقى عالية جدا

( منظم الرحـلات والبرامج السياحية )

Tour Operator

- شروط الوظيفة : الاولوية لخريجى السياحة والفنادق وخصوصا قسم الدراسات السياحية وايضا لخريجى كليات الالسن , وكمان لازم اجادة الانجليزى او لغة تانية وكمان الكمبيوتر , وغالبا بيشترط الخبرة السابقة فى اى شركة سياحية .

- المميزات : مرتب حلو - وظيفة غير مرهقة الى حد ما - وظيفة متوفرة .

- العيوب : لا يوجد عيوب تقريبا .

- طبيعة العمل : يقوم الـTour Operator بتنظيم الرحلة او البرنامج السياحى التى سوف يقوم به الفوج السياحى او المسافرين من حيث مكان الاقامة ونوعها وكيفية الاستجمام والزيارات التى تتضمنها الرحلة او البرنامج ....وغيرها ثم يقوم بتوفير مندوب شركة السياحة والمرشد السياحى والسائق

- متوسط المرتب : يختلف الراتب من شركة لاخرى واحيانا صغير واحيانا كبير , يعنى الصراحة مقدرش اقول راتب معين , بس اكيد مش هيقل عن 700 جنية مصرى .

( قائـــد الرحلــــة )

Tour Leader

- شروط الوظيفة : الاولوية لخريجى السياحة والفنادق وخريجى الالسن واللغات ويشترط المظهر الحسن واللباقة والثقافة وسرعة التصرف واجادة احدى اللغات اجادة تامة

- المميزات : اللغة اللى معاك عمرها ما هتضيع منك لانك علطول مع السياح - مرتب كويس

- العيوب : وظيفة مرهقة شوية - ساعات العمل طويلة .

- طبيعة العمل : وظيفة الـTour Leader يختلف معناها غالبا من شركة لاخرى يعنى فى شركة هو اللى بيقوم باستقبال السيــاح من المطار وياخذهم الى المطاعم والامكان المشهورة اى انه مرشد ومندوب للشركة اللى شغال فيها او بمعنى اخر مرافق للفوج السياحى فى رحلاتهم وتنقلاتهم .

- متوسط المرتب : يختلف الراتب من شركة لاخرى بس المرتب فى المجمل بيبقى كويس وكمان بيبقى فى عمولات يعنى من الاخر لا يقل عن 900 جنية تقريبا